យុវជនម្នាក់ត្រូវបានសមត្ថកិច្ចចាប់ខ្លួនបន្ទាប់ពីបានធ្វើសកម្មភាពចាប់រំលោភស្ត្រីមេម៉ាយកូន១
02-June-2016 | ដោយ មែន កំសត់
ខេត្តតាកែវ ៖ យុវជនម្នាក់ត្រូវបានសមត្ថកិច្ចនគរបាលស្រុកត្រាំកក់តាមចាប់ខ្លួន ដល់ផ្ទះបន្ទាប់ពីបានធ្វើសកម្មភាពចាប់រំលោភស្ត្រីមេម៉ាយកូន១រហូត បានសម្រេចហើយថែមទាំងដោះយកគ្រឿងអលង្ការ និងប្រមូលយកលុយអស់មួយចំនួនទៀត ។ ហេតុការណ៍ចាប់រំលោភនេះបានកើតឡើងកាលពីវេលាម៉ោង៩ និង៤៥នាទីយប់ថ្ងៃទី៣១ ខែឧសភា ឆ្នាំ២០១៦ នៅឃុំត្រពាំងធំខាងត្បូង ស្រុកត្រាំកក់ ខេត្តតាកែវ ។
លោក សុខ ជា អធិការរងនគរបាលស្រុកត្រាំកក់ បានឲ្យដឹងថា ជនសង្ស័យដែលត្រូវចាប់ខ្លួនមានឈ្មោះ ប៉ិចស្រស់ ភេទប្រុស អាយុ២៤ឆ្នាំ រស់នៅភូមិឃុំខាងលើ ចំណែកស្ត្រីរងគ្រោះមានឈ្មោះ ភ.ស.វ អាយុ៣៧ឆ្នាំ ជាស្ត្រីមេម៉ាយកូន១ ។
លោកអធិការរងស្រុក បន្តទៀតថា ជនសង្ស័យនិងស្ត្រីរងគ្រោះរស់នៅភូមិជាមួយគ្នា នៅមុនពេលកើតហេតុស្ត្រីរងគ្រោះបានដេកនៅលើផ្ទះ២នាក់កូន ពេលនោះជនសង្ស័យបានឡើងធ្វើការចាប់រំលោភរហូតបានសម្រេច ពេលរំលោភរួចជនសង្ស័យបានដោះយកខ្សែ.កប្លាទីន១ខ្សែទម្ងន់២ជី ចិញ្ចៀនប្លាទីន១វង់ទម្ងន់១ជី និងយកលុយចំនួន៥០ម៉ឺនរៀលរត់គេចខ្លួនបាត់ ។ លុះព្រឹកឡើងស្ត្រីរងគ្រោះបានមកប្តឹងសមត្ថកិច្ចឲ្យជួយអន្តរាគមន៍ ភ្លាមៗនោះសមត្ថកិច្ចនគរបាលក៏ទៅចាប់ខ្លួនជនសង្ស័យដល់ផ្ទះកាលពី វេលាម៉ោង៨ព្រឹក ថ្ងៃទី១ ខែមិថុនា ឆ្នាំ២០១៦ រួចបានឲ្យជនសង្ស័យនាំទៅយកលុយ ខ្សែ.ក ចិញ្ចៀន ដែលជនសង្ស័យយកទៅលាក់ក្នុងរន្ធក្តាមក្នុងវាលស្រែខាងត្បូងភូមិយក មកប្រគល់ឲ្យស្ត្រីរងគ្រោះវិញ ។
នៅចំពោះមុខសមត្កិច្ច ជនសង្ស័យ ប៉ិច ស្រស់ បាននិយាយសារភាពថា រូបគេពិតជាបានធ្វើសកម្មភាពចាប់រំលោភ និងយកលុយ ចិញ្ចៀន ខ្សែ.កពីស្ត្រីរងគ្រោះពិតប្រាកដមែន ។
លោក ហ៊ុន ហែម នាយការិយាល័យព្រហ្មទណ្ឌកម្រិតធ្ងន់ខេត្ត បានឲ្យដឹងថា នៅពេលនេះយើងបានកសាងសំណុំរឿងគ្រប់គ្រាន់អស់ហើយ នៅរសៀលថ្ងៃទី២ ខែមិថុនា ឆ្នាំ២០១៦នេះ យើងនឹងបញ្ជូនជនសង្ស័យទៅសាលាដំបូងខេត្ត ដើម្បីចាត់ការទៅតាមផ្លូវច្បាប់ ។
ប្រភពពីអ្នកដឹងហេតុការណ៍នេះបាននាំគ្នានិយាយលែបខាយថា ប្រហែលជាជនសង្ស័យគិតថាស្ត្រីមេម៉ាយកូន១រូបនោះមិនប្តឹងទេមើលទៅ បានជាធ្វើសកម្មភាពរួចនៅផ្ទះធ្វើដូចជាគ្មានរឿងអ្វីកើតឡើងសោះ អ៊ីចឹង ។ ទាល់តែសមត្ថកិច្ចនគរបាលទៅដល់ចាប់ដាក់ខ្នោះ តាំងឯងធ្វើមុខស្ងួត ។ រំលោភគេហើយ ដោះយកគ្រឿងអលង្ការ និងយកលុយគេទៀត បើគេមិនប្តឹងទើបវាចម្លែក ៕
ចំនួនអ្នកទស្សនា
- ថ្ងៃនេះ2081
- ម្សិលមិញ14181
- សប្តាហ៍នេះ2081
- ខែនេះ117231
- ឆ្នាំនេះ117231
- សរុប20559687